En Galicia Hoxe
Duascentas persoas maniféstanse na Alameda de Santiago a prol do voto progresista
Algo menos de duascentas persoas reuníronse onte na Alameda compostelá para celebrar “o voto progresista” nas eleccións galegas, en resposta á convocatoria que os propios cidadáns fixeron a través de varias páxinas de Internet.
A intención inicial era formar unha cadea hunana que unise as estatuas de Castelao (na mesma Alameda) e de Pablo Iglesias (en Vite), pero unha afluencia de xente menor da esperada fixo que se transformase nunha manifestación que recorreu a distancia entre os dous monumentos.
“Foi unha iniciativa cidadá para celebrar o resultado electoral e a unión desas dúas correntes históricas –o PSdeG e o BNG– da esquerda”, comentou o escritor galego Suso de Toro, participante na marcha. Óscar Sánchez, un dos promotores, quixo deixar claro que non tiñan a intención de negar o dereito ó voto dos emigrantes, senón pedir que o realicen coas mesma garantías que o resto dos galegos.
